chaNd roz aur meri jaan faqat chaNd hi roz
zulm ki cHaauuN meN dam lene par majbuur haiN ham
aur kucH der sitam saih leN, taRap leN ro leN
apne ajdaad ki miiraas hai maazuur haiN ham

jism par qaid hai jazbaat pe zaNjiireN haiN
fikr mehbuus hai guftaar pe taaziireN haiN
aur apni himmat hai keh ham phir bhi jiye jaate haiN
zindagi keyaa kisi muflis ki qabaa hai jis meN
har ghaRi dard ke paiwaNd lage jaate haiN
 
lekin ab zulm ki meyaad ke din thoRe haiN
ik zaraa sabr keh fariyaad ke din thoRe haiN

arsaa-e-dahar ki jhulsi hui wiiraani meN
ham ko rehnaa hai par yuuN hi to nahiN rehnaa hai
ajnabi haathoN kaa benaam garaaN-baar sitam
aaj sehnaa hai hameshaa to nahiN sehnaa hai

yeh tere husn se lipTi hui aalaam ki gard
apni do rozaa jawaani ki shikastoN kaa shumaar
chaaNdani raatoN kaa bekaar dehaktaa huwaa dard
dil ki besuud taRap jism ki maayuus pukaar

chaNd roz aur meri jaan faqat chaNd hi roz

Tags: aalaam, ajdaad, ajnabi, arsaa, bekaar, benaam, besuud, chaaNdani, cHaauun, dahar, dard, dehaktaa, faiz ahmad, faqat, fariyaad, fikr, garaanbaar, gard, guftaar, haathon, himmat, husn, jaan, jawaani, jazbaat, jhulsi, jism, maayuus, majbuur, mehbuus, meyaad, miiraas, muflis, paiwand, pukar, qabaa, raaton, roz, sabr, sehnaa, shumaar, sitam, taaziir, tarap, wiiraani, zanjiir, zindagi, zulm

chaaNd nikle kisi jaanib teri zebaai kaa
raNg badle kisi Suurat shab-e-tanhaai kaa

daulat-e-lab se phir aye kHusraw-e-shiiriiN-dahnaaN!
aaj arzaaN ho koi Harf shanaasaai kaa

garmi-e-rashk se har anjuman-e-gul-badnaaN
taZkirah chheRe teri pairahan-aaraai kaa

SeHn-e-gulshan meN kabhi aye shah-e-shamshaad-e-qadaaN
phir nazar aaye saliiqah teri ra’naai kaa!

aik baar aur masiihaa-e-dil-e-dil-zadagaaN!
koi wa’dah, koi iqraar masiihaai kaa!

diidah-o-dil ko saNbhaalo ke sar-e-shaam-e-firaaq
saaz-o-saamaan baham pohNhchaa hai ruswaai kaa!

 Singer : Maaz Moeed

Listen this Ghazal in Voice Of Farida Khanum

Tags: aaraai, ahmad, anjuman, arzaan, baham, chaaNd, dahanaan, daulat, diidaa, dil, faiz, firaaq, garmi, gul, gulshan, iqraar, jaanib, khusraw, lab, masiihaa, masiihaai, nazar, pairahan, qadaan, ranaai, rang, rashk, ruswaai, saaz, saliiqah, samaan, sar, sehn, shaam, shab, shah, shamshaad, shanaasaai, shiirii, suurat, tanhaai, wadah, zadagaan, zebaai

bol keh lab aazaad haiN tere
bol zabaaN ab tak teri hai
teraa sutwaaN jism hai teraa
bol keh jaaN ab tak teri hai
dekh keh aahan-gar ki dukaaN meN
tuNd haiN shole surkH hai aahan
khulne lage quffloN ke dahaane
phailaa har aik zanjiir kaa daaman
bol yeh thoRaa waqt bahut hai
jism-o-zabaaN ki maut se pehle
bol keh sach ziNdaa hai ab tak
bol jo kuchh kaihna hai kaih le

Singer: Tina Sani

Tags: aahan, aazaad, ahmad, bol, daaman, faiz, gar, jism, lab, maut, qufflon, sach, shole, surkh, sutwaan, tund, waqt, zabaan, zanjiir, zindaa

bahut milaa na milaa zindagi se gHam keyaa hai
mataa-e-dard baham hai to besh-o-kam keyaa hai

ham aik umr se waaqif haiN ab na samjhaao
keh lutf keyaa hai mere meharbaaN sitam keyaa hai

kare na jag meN alaao to sher kis maqsad
kare na shehar meN jal-thal to chashm-e-nam keyaa hai

ajal ke haath koi aa rahaa hai parwaanaa
na jaane aaj ki fehrist meN raqam keyaa hai

sajaao bazm gHazal gaao jaam taazaa karo
bahut sahi gHam-e-geti sharaab kam keyaa hai

lihaaz meN koi kuchh duur saath chaltaa hai
wagarnaa dehar meN ab kHizr kaa bharam keyaa hai

Tags: aaj, ahmad, alaao, baham, bazm, besh, bharam, chashm, dard, dehar, faiz, fehrist, geti, gham, ghazal, haath, jaam, jag, khizr, lihaaz, lutf, maqsad, mataa, meharbaan, nam, parwaanaa, raqam, sajaao, shehar, sher, sitam, taazaa, umr, waaqif, wagarnaa, zindagi

Bahaar aai
to jaise yak’baar laut aaye haiN phir adam se
woh khawaab saare, shabaab saare
jo tere honToN pe mar miTe the
jo miT ke har baar phir jiye the
nikhar gaye hain
gulaab saare
jo teri yaadon se muskh’bu hain
jo tere ushshaaq kaa lahu hain
bahaar aai
ubal paRe hain azaab saare
malaal-e-ehbaa-e-dostaaN bhi
kHumaar-e-aagHosh-e- meh’washaaN bhi
gHubaar-e-kHaatir ke baab sare
tere humaare saawaal saare, jawaab saare
bahaar aai
to khul gaye hain naye sire se hisaab saare

naye sire se hisaab saare
bahaar aai
bahaar aai

Singer: Tina Sani

Tags: adam, azaab, baab, bahaar, dostaan, ehbaa, faiz ahmad, hisaab, hoNToN, jawaab, khawaab, mehwashaan, sawaal, shabaab, yakbaar

ab wohi harf-e-junuuN sab ki zubaaN Thehri hai
jo bhi chal nikli hai vo baat kahaaN Thehri hai

aaj tak shaikH ke ikraam meN jo shay thi haraam
ab wohi dushman-e-diiN raahat-e-jaaN Thehri hai 

hai kHabar garm keh phirtaa hai gurezaaN naaseh
guftaguu aaj sar-e-ku-e-butaaN Thehri hai 

hai wohi aariz-e-lailaa wohi shiirin kaa dahan
nigaah-e-shauq ghaRi bhar ko yahaaN Thehri hai

wasl ki shab thi to kis darjaa subak guzri hai
hijr ki shab hai to kyaa sakHt garaaN guzari hai

bikhri ek baar to haath aai kab mauj-e-shamiim
dil se nikli hai to kab lab pe fugHaaN Thehri hai

dast-e-sayyaad bhi aajiz hai kaff-e-gulchiiN bhi
buu-e-gul Thehri na bul-bul ki zabaaN Thehri hai 

aate aate yuuN hi dam bhar ko ruki hogi bahaar
jaate jaate yuuN hi pal bhar ko kHizaaN Thehri hai

ham ne jo tarz-e-fugHaaN ki hai qafas meN ijaad
“Faiz” gulshan meN vo tarz-e-bayaaN Thehri hai

Tags: aariz, ahmad, baat, bayaan, bul-bul, butaan, dahan, darjaa, dast, dushman, faiz, fughaan, garaan, guftaguu, gurezaan, haraam, harf, hijr, ikraam, junuun, kaff, khabar, lailaa, mauj, naaseh, nigaah, qafas, raahat, sayyaad, shab, shaikh, shauq, shay, shiirin, subak, tarz, wasl, zubaan

aaye kuchh abr kuchh sharaab aaye
us ke baad aaye jo azaab aaye

baam-e-miinaa se maahataab utre
dast-e-saaqi meN aaftaab aaye

har rag-e-kHuuN meN phir charaagHaaN ho
saamne phir wo benaqaab aaye

umr ke har warq pe dil ko nazar
teri meher-o-wafaa ke baab aaye

kar rahaa thaa gHam-e-jahaaN kaa hisaab
aaj tum yaad behisaab aaye

na gayi tere gHam ki sardaari
dil meN yuuN roz inqalaab aaye

jal uThe bazm-e-gHair ke dar-o-baam
jab bhi ham kHaanmaaN-kHaraab aaye

is tarah apni Khamshi guuNji
goyaa har simt se jawaab aaye

‘Faiz’ thi raah sar basar maNzil
ham jahaaN pohuNche kaamyaab aaye

Singer:  Runa Laila

Tags: abr, baab, baam, basar, bazm, behisaab, benaqaab, charaaghaan, dar, dil, faiz ahmad, ghair, goyaa, hisaab, inqalaab, jahaaN, jawaab, kaamyaab, khaanmaan, khamshi, kharaab, khuun, manzil, meher, nazar, rag, sardaari, sharaab, simt, wafaa, warq, yaad

taswiir teri dil meraa behlaa na sake gi
yeh teri tarah mujh se to sharmaa na sake gi

maiN baat karuN gaa to yeh kHaamosh rahe gi
siine se lagaa luuN gaa to ye kuchh na kahe gi
aaraam wo kyaa de gi jo taRpaa na sake gi

yeh aaNkheN haiN Thehri huwi chaNchal wo nigaaheN
yeh haath haiN sehme huwe aur mast wo baaheN
parchhaai to insaan ke kaam aa na sake gi

in hoNToN ko “Fayyaz” maiN kuchh de na sakuN gaa
is zulf ko maiN haath meN bhi le na sakuN gaa
uljhi hui raatoN ko yeh suljhaa na sake gi

Singer:  Talat Mahmood

Tags: aankhen, aaraam, baahen, baat, chanchal, dil, fayyaz haashmi, haath, insaan, kaam, mast, nigaahen, parchaai, raaton, sehme, sharmaa, suljhaa, taswiir, thathri, uljhi, zulf

Takraa hi gai meri nazar un ki nazar se
dhonaa hi paRaa haath mujhe qalb-o-jigar se
 
izhaar-e-muhabbat na kiyaa bas isi Dar se
aisaa naa ho gir jaauun kahiN un ki nazar se
 
aye zauq-e-talab josh-e-junuun yeh to bataa de
jaanaa hai kahaaN aur ham aaye haiN kidhar se
 
‘Fayyaz’ ab aayaa hai junuun josh pe apnaa
haNstaa hai zamaanaa maiN guzartaa huun jidhar se

Tags: dar, fayyaz hashmi, hanstaa, izhaar, jigar, josh, junuun, muhabbat, nazar, qalb, talab, zamaanaa, zauq

na tum mere na dil meraa na jaan-e-naatawaaN meri
tasawwur meN bhi aa sakti nahiN majbuuriyaaN meri

na tum aaye na chain aayaa na maut aai shab-e-waadaa
dil-e-muztar thaa maiN thaa aur thiN betaabiyaaN meri

abas naadaaniyoN par aap apni naaz karte haiN
abhi dekhi kahaaN haiN aap ne naadaaniyaaN meri

yeh maNzil yeh hasiiN maNzil jawaani naam hai jis kaa
yahaaN se aur aage baRhnaa aye umr-e-rawaaN meri

Tags: aap, betaabiyaan, chain, dil, Faiyyaz Hashmi, hasiin, jaan, majbuuriyaan, manzil, maut, muztar, naadaaniyaan, naadniyon, naaz, natawaan, rawaan, shab, tasawwur, umr, waadaa